Tuesday, November 13, 2012

إضرب باسم ربك الذي خلق



يخي، الخميس عطلة، إضرب اليوم ومدها إجازة...

إضرب يا إنسان، إضرب يا بني آدم، إضرب عن العمل اليوم الأربعاء، ١٤/١١/٢٠١٢ ، مش مهم الشغل، كم منشتغل وعلى الفاضي، إضرب، من أجلك، من أجل أبنائك، من أجل زوجتك (زوجك)، أضرب لأنك مستغبى، إضرب لأنك مضحوك عليك، إضرب لأن ما معك تجيب غاز، إضرب. إضرب لأنه عيب علينا ما منكمل الشهر بلا ما نتداين، عيب ما نضرب لأنه خلص قبعت، عيب ما تضرب لأن إذا حبيب النظام مسكين، ما يفضح عرضه، إضرب خلص، هذا الوقت، إضرب عشان الشرف وعشان الأخلاق وعشان إحترامك لنفسك.

إضرب وأقعد مع الولاد، إضرب بلا منو دوام الجامعة، ليش هو من كثر العلم اللي بسلكونا ياه، إضرب وأقعد مع مرتك، إضرب وألعب دق شدة مع جارك، بلا الدوام يخي، 

إضرب إذا بتستحي من إبنك ما معك مصاري تعطيه، إضرب إذا بتشتغل على الفاضي وما معك لا بالجيب ولا تحت البلاطة، إضرب لأنو هرمنا، وتعبنا، وانقلت قيمتنا. إضرب لأننا بشر، ونستحق العيش بكرامة، إضرب لأن الوقت حان لأن تكترث لمستقبلك، لطعامك الأسبوع القادم، إضرب لأننا ولو لمرة علينا أن نصبح شعبا واحدا لا يضحك عليه ولا نخاف من بعضنا، كلنا تحت المقصلة اليوم، إضرب لأن لا أحد يكترث لك إلا الناس أمثالك.

إضرب يلعن أبوهم عرص...

إضرب لأن الحكومة/النظام/العالم/الشغل/إللي بدك ياه، بيضحك علينا، وذلنا مليون مرة، إضرب يخي عشان الإجازة، إضرب جكر، إضرب مبدأ، إضرب زناخة، إضرب حرقة راس على الأسعار، إضرب لأننا ما زالت فينا الروح وحلاوة الروح. إضرب لأنك فاضي أشغال، بس ما تروح على الشغل.

إذا هسا عم بتشوف هذا التعليق، وإنت بالشغل، لسة مش متأخر، إضرب، إذا ما بتقدر تضرب، روح لأنك مريض، لأنه أخوك عمل حادث، روح وخذ إجازه، خلي يبين مين بشتغل ومين بيقبض، إضرب لأنه مش جاي عبالك تداوم، إضرب وخذ إنذار، هو إنت أول واحد بياخذ إنذار؟  إضرب عن العمل، بكفي يا زلمه، بكفي، حيطنا واطي يا سيدي، بس مش هيك.

اليوم إضراب، سيبك، يرفعوا أسعار زي ما بدهم، إنت خذه إجازة..

No comments:

Post a Comment

Blogger templates

About